South Sudan Vice President tualthah thubuai siam sak

South Sudan vice president Riek Machar chu kumin March thlaa an hnam, Nuer zinga pawl pakhat, White Army in an ram hmarchhak lama military base an beihna kaihhnawihah tualthat, ram phatsan leh mihring puite laka pawikhawihna lian tak thlenah puhin thubuai siam sak a ni.

White Army-in Upper Nile state-a Nasir County-a sipai hmun an beihnaah hian sipai 250 chuang an thi a ni. Sorkar chuan he inbeihna thlengah hian Machar hi a mawhphurtu nia sawiin, mi dang 20-te nen thubuai hi an siam sak a; firfiaka chetna thlenna leh sorkar hmunte tichhiaa puhna pawh a tel.

Justice minister Joseph Geng Akech chuan Vice President thubuai siam sak a nih thu hi Ningani khan puangin, Upper Nile state-a sipai hmun beihna thleng chu Geneva Conventions leh international humanitarian law bawhchhiatna lian tak a nih thu a sawi.

President Salva Kiir chuan Machar hi thubuai siam sak a nih hnuah sorkara a nihnate chu hlih sak nghal a ni tih a sawi a, ani bakah pawikhawihna thlenga inhnamhnawiha puh dang, petroleum minister Puot Kang Choi nihna pawh hlih a ni, a ti. President leh Vice President-te hi thuneihna insem chungchangah a hma aṭangin an inkar a ṭha lo hle.

Kum 2011 khan South Sudan hian Sudan aṭangin independence a hmu a, mah se rei loteah thuneihna inchuhin Kirr leh Machar lamṭangte hi an inbei zui a, kum eng emaw chen tualchhung indona thlengin mi nuai 4 velin an thih phah a ni. Kum 2018-ah khan sorkara thuneihna insem tura inremna siamin, indo hi an titawp a ni. Mahse, sorkar an din hnuah pawh an inep zui reng a, kum 2024 kumtawp inthlanpui neih tura tih pawh tun thlengin tihkhawtlai a la ni.