Pakistan-ah tuilian vangin mi mtd 2 chuang sawn chhuak

Pakistan khawchhak lam bialah ruahsur nasa avanga tuilian nasa tak a thlen vangin mi maktaduai hnih chuang chu hmun him lamah sawn chhuah an ni tih thuneituten an sawi.

National disaster manage-ment authority hotu Inam Haider Malik chuan Punjab province aṭangin mi mtd 2 vel sawn chhuah an nih bakah, Sindh province aṭangin nuai 1.5 vel sawn chhuah an ni bawk tih a sawi. Sawn chhuah ngai hi an la pun a rinawm thu a sawi bawk.

International Medical Corps report thar berin a tarlan danin, kumin June thla tawp lam aṭang khan ruahsur nasain chhiatna a thlen hrang hrangah mi 900 chuang an thi tawh a ni. Tuilianin chenna in bakah thlai chinna hmun tam tak a tichhe tel bawk.

United Nations chuan Pakistan puihna tur hian USD mtd 5 a pe a, US state deparment pawhin harsatna tawkte chhan chhuah leh chhawmdawl hna thawhna turin fund pek a remti bawk. Heihi US president Donald Trump-a term hnihnaa ram danga chhiatna tawkte puihna tur pawm hmasa ber nia sawi a ni.