Iran nuclear deal Mi that tura phalna pekna ang a ni: Netanyahu

World power ram paruk, P5+1 leh Iran ram te'n Iran nuclear program chungchangah hun rei tak inbiakna an neih hnuin Thawhlehni khan inremna an siam a, mahse he inremna hi Israel chuan na takin a sawisel nghal.

Israel Prime Minister Benjamin Netanyahu chuan nuclear deal siam tak chu Iran hnenah midangte that tura phalna pek ang a ni tiin, khawthlang ramte chu misual lakah an tlawm ta a ni, a ti.

Inremna an siam angin US, European Union leh United Nations chuan Iran an hrekna hrang hrangte an hlip dawn a, Iran pawhin nuclear ralthuamna siamna atana a hmang nia khawthlang ramte'n an ngaih, a nuclear program chu hun eng emaw chen a chawlhtir dawn a ni.

Israel PM chuan Iran inremna siampui chu thil tihsual lian tak a ni tiin, ramdangin an hrekna an hlih dawn tak avangin nuclear ralthuam siamna hun remchang tak an siamsak zawk dawn a ni, a ti.

Israel Inner Security Cabinet member Naftali Bennett pawhin Iran nuclear deal chu khawvel tan hun thim leh hlauhawm chhinchhiahna a ni, a ti. Bennet chuan, "Kum 20 hnuah London emaw New York-ah nuclear bomb a lo puak a nih chuan, a inṭanna chu July 14, 2015 a ni, tiin kan chhui let thei ngei ang," a ti.

Israeli Deputy Foreign Minister Tzipi Hotovely chuan inremna an siam chu khawthlang ramte tlawmna lantirna a ni tiin, Israel chuan he inremna hi a taka kalpui a nih lohna turin theihtawp a chhuah zel dawn tih a sawi.