El Chapo Guzman-a A tlanchhuah danin sawi zui a hlawh

Kar kalta Inrinni zana tan-in aṭanga tlanchhuak, Mexico rama ruihhlo tawlhtu pawl lian Sinaloa Cartel hotu, Joaquin 'El Chapo' Guzman chu ngawrh taka zawn mek ni mah se, man a la ni lo.

Mexico ram tan-in zinga venhim khauhna ber nia sawi, Altiplano tan-in aṭangin Guzman hi Inrinni zan khan a tlanchhuak a, mahse a tlanchhuah thu hi a tuk Pathianni-ah chauh hriatchhuah a ni. Tlanchhuah a tum thu hi jail-a thawktu ṭhenkhatin hre ru-in, an zeppui nia ngaitu mi tam tak an awm.

Guzman hi a tanna cell-a inbual pindan chhuat rehkuak aṭangin leilawn hmangin a hnuaia feet 30-a thuka leiverh-ah a chhuk a, lei verh kilometre 1.7 zeta thui hi tan-in piaha in sak laiah a chhuak a ni. Lei verh chhuahna in sak bula chengte chuan he in hi thla 10 kalta khan hnathawktute'n phalna nei loin an sa niin an sawi.

Tlanchhuahna atana lei verh hi a zau ṭha hle a, a chhungah hian patling pangngai tan pawh dinga kal theih a ni. A chhungah hian electric light leh boruak luh theihna turte pawh siam vek a ni a, leiverhna atana hmanrua ngaite lakkhawmna leh lei nawi paihna atana hman motorcycle pawh hmuh a ni.

Guzman hi tan-in chhunga a chetvel dan leh a kalna chin englai pawha hriat theih a nih theihna turin a taksaah chip vuah a ni a, hetichung hian a tlanchhuah thu hi a tukah hriatchhuah chauh a nih avangin a tlanchhuah theih danah hian tan-in a thawk leh official-te pawh an inrawlh nia ngaitu mi tam tak an awm. Interior Minister Miguel Angel Osario Chong pawhin prison official zingah puitu a neih ngei a rin thu a sawi. Mexico sorkar chuan Altiplano prison official pathum a ban tawh a, thawktu mi 30-te chu thu zawhfiah turin a hreng mek bawk.

Tan-in chhunga Guzman chet vel dan enthlakna tur hi dah ni mah se, national human rights commission hnenah a inbual pindan surveillance camera dah chu a mimal dikna chanvo palzutna a ni tiin dah tir lo turin a lo ngen tawh a ni. A tlanchhuahna lei verh pawhna tur hi a inbualna pindan aṭang hian siam a ni ta a ni. Guzman hian tan-in chhung awm dan chipchiar lanna map pawh a nei niin Interior Minister Chong chuan a sawi.

Mexico sorkar chuan Thawhlehni khan Guzman-a tlanchhuah hma lawka a pindan a awm lai video a tichhuak. He video-ah hian Guzman hi a bual pindan leh a khum awmna inkara vawi tam tak a kal kual sek hmuh a ni. National Security Commissioner Monte Alejandro Rubido chuan bual pindanah hian tangte hi rei tak tak an awm fo avangin thil danglam vak a ni lo tih a sawi. Mahse Guzman an hmuh hnuhnun ber chu Inrinni zan dar 8.52 a ni a, mahse prison guard-te'n a tlanchhuah thu an puan chu a tukah daih a ni thung.

Joaquin Guzman hi kum 2001 khan a tanna jail aṭangin puansuk tur thiarkhawmna hmangin a lo tlanchhuak tawh bawk a, kum 13 hnu, kum 2014 February thla khan man a ni leh ta chauh a ni.

Mexico sorkar lai leh sorkar hmasa-te chuan Guzman hi 'public enemy No 1" tiin an puang vek a, a kaihhruai Sinaloa Cartel hi khawvela ruihhlo tawlhrukna kawngah pawl hlauhawm leh thiltithei bera ngaih a ni. Forbes magazine chuan Guzman hi khawvela pa hausa leh thiltithei ber zingah a lo telh tawh bawk a, a pawlin kum khata sum a lakluh hi US tluklehdingawn 3 vel tlinga chhut a ni.

Mexico sorkar chuan Guzman man thei hnenah lawmman US dollar maktaduai 3.8 a phal thu a puang tawh. Lei verhin a pawh in sak lai neitu emaw, a luahtu emaw pawh hriatchhuah tumin zawn mek a ni a, Guzman-a ukil pahnihte pawh thu zawhfiah an ni tawh.