Kum hnih hnuah Westgate Mall hawng leh dawn

Kum 2013-a Somalia Islamist firfiakte'n Kenya rama Westgate mall an beih chu kum hnih chhung khar a nih hnuah, tunkar Inrinni hian hawn a ni leh dawn ta.

Al Qaida firfiak pawl nena inzawm, Somalia firfiak pawl Shebab member pali-te chuan kum 2013, September thla khan Kenya khawpui, Nairobi-a Westgate mall-ah hian grenade tipuakin, dawr nghaktu leh staff-te chu an pawng kah a ni. Firfiakte pawikhawihnaah hian mi 67 an thi a, midang tam takin hliam an tuar a, mall pawh a chhe nasa hle.

Pawikhawihna thlen hnu hian mall hi khar nghalin, chei ṭhat a ni. Thawhlehni khan a chhung lam chei ṭhat hna chu zawh a ni.

Nairobi governor Evans Kidero chuan, "Thla 22 liamtaah khan Kenya ram chanchina hun lungchhiat thlak tak mai kan tawng a, rampum kan ṭap a ni. Mahse tunah chuan Westgate hi a lo kir leh dawn ta a ni," a ti. Mall shareholder Alex Trechtenberg pawhin venhimna ṭha tak dah a nih tur thu a sawi.

Shebab hian Kenya ramah pawikhawihna an thlen zui fo a, kumin April thla khan Garissa University beiin mi 148 an that a ni. Thawhṭanni khan Lamu bialah bomb a tipuak a, civil mi panga an thi bawk.