Nepal-in hnathawktu 50,000 training pe dawn
Nepal sorkar chuan an ramin lirnghing rapthlak tak a tawh avanga thil chhiate siamṭhat hna a thawh meknaah, hnathawktu 50,000 te training a pe dawn.
Finance Minister Ram Sharan Mahat chuan in sak ṭhat hna thawh mekah mi 50,000 te chu sorkarin in sak leh electric lam hnate a zirtir dawn a ni, a ti.
Mahat chuan kumin an ram economy ṭhanna chu 3% vel chauh a ni pha dawn tiin a sawi a, hei hi kum 2007 hnua a hniam ber ṭum a ni.
Nepal sorkar chuan lirnghingin thil a tihchhiat hrang hrangte din thar lehna atan dollar maktaduai 910 vel a seng dawn a ni. Lirnghing hian chenna in leh sorkar office building tam tak bakah, hmanlai thil hlu eng emaw zat a tichhe tel bawk.
June thla aṭang khan lirnghing tuarte ṭanpui hna leh thil chhiate siamṭhat hna hi thawk ṭan a ni. Hetihlai hian lirnghing tuar mi tam tak chuan sorkar lam aṭanga chhawmdawlna an la hmuh theih loh vangin refugee camp-ahte an la khawsa mek a ni.