Iran nuclear deal an siam thei ta
Iran leh world power ram paruk-te'n Iran nuclear program chungchangah hun rei tak inbiakna an neih hnuin nimin khan Vienna-ah inremna an siam.
Iran diplomat chuan inremna an siam tak thu hi sawiin, an inremna siam zingah hian Iran rama nuclear site-te endiktu, UN inspector-te'n sipai hmun enfiah an dil phalna turte pawh a tel tiin a sawi. Hemi rual hian UN inspector-te dilna hi tihhlawhtlin vek tur tihna a ni kher lo a, hei bakah hian Iran lam hian an tikhawtlai thei dawn bawk a ni.
World power ram paruk-te hi P5+1 te an ni a, China, France, Russia, United Kingdom, leh United States bakah Germany te an ni.
Iran chuan UN thil phutte a hnial thei dawn a, hemi chungchang hi Iran leh world power ram paruk aiawhte awmna board-in an rel fel ṭhin dawn a ni.
UN International Atomic Energy Agency (IAEA) in Iran sipai hmunpuite tlawha enfiah a dilna chu Iran hian a remti lo a, IAEA chu an sipaite thuruk enthlakna remchangah hman theih a ni, a ti. Mahse US chuan Iran ram hian ramdangte an hrekna tihtawp a duh chuan IAEA a thawhpui chu thil pawimawh tak a ni, a ti. Hei vang hian Iran chuan a sipai hmunpuite enfiah phal tura an phutna hi a thuphungin a pawmsak a, mahse an dilna zawng zawng a remti vek dawn em tih erawh sawi theih a la ni lo.
Iran nuclear program chungchangah hian inremna siam tumin kum sawm chuang zet inbiakna neih a lo ni tawh. World power ramte chuan Iran-in nuclear program a kalpui chu titawp turin an phut a, mahse Iran chuan ralthuam siamna atan ni loin, energy siamna tur zawka kalpui a nih thu a sawi a, inremna an siam dawn a nih chuan khawthlang ramte'n Iran an hrekna hrang hrangte an hlih phawt a phut let thung.