Mexico-in Guzman manah dollar mtd 3.8 a phal

Mexico sorkar chuan kar kalta Inrinni-a jail aṭanga tlanchhuak, ruihhlo tawlhru pawl hotu Joaquin Guzman chu man leh tumin a zawng mek a, a man thei hnenah an ram pawisa pesos maktaduai 60 (dollar maktaduai 3.8) lawmman a phal.

Joaquin Guzman hi kar kalta Inrinni khan a tanna, Altiplano jail-a a pindan-a lei a verh aṭangin a tlanchhuak a, a leiverh hi kilometre 1.5 zeta thui a ni. Guzman hi a chetvel hriat theihna tur, monitoring bracelet vuahtir a ni chung leh, darkar 24 chhung enthla reng tura tih a nih chungin a tlanchhuak a, a tlanchhuah thu hi a tuk Pathianni-ah hriat chhuah chauh a ni.

Interior Minister Miquel Angel Osorio Chong chuan Guzman hi man ngei tumin ngawrh taka zawn a nih thu a sawi a, venhimna khauh taka hnuai awm, Altiplano jail aṭanga a tlanchhuah theih danah hian tan-in thawk official-te'n an pui ni theia a lan thu a sawi. Guzman tlanchhuah avang hian jail official pathum chu ban an ni tawh a, an zingah hian jail director pawh a tel.

Guzman-a'n tlanchhuahna atan a hman, leiverh hi tan-in bula in pakhatah a chhuak a, a chhuahna hmunah hian khum leh eirawngbawlna te pawh hmuh a ni. Lei hi ni tam tak chhung an verh niin a lang. Lei verh zau zawng leh thui zawng aṭanga chhutin a verhtute hian lei an paih hi motor lian phur 379 zet a tling tiin an sawi. Internal Drug Enforcement Administration chuan Guzman hian kum 2014, February thla a man a nih khan jail aṭanga tlanchhuah dan hi a ngaihtuah nghal niin a tarlang. DEA hian thla 19 liamtaa khan Mexico thuneitute hnenah Guzman hi a chhungte leh ruihhlo tawlhrukna lama a thurualpuite'n chhanchhuah tuma beih an tum thu pawh a lo hriattir tawh bawk.