Iraq buainaah civil mi 15,000 chuang an thi tawh

United Nations chuan kum 2014, January thla aṭang khan Iraq ramchhung buaina avangin civil mi 15,000 an thi tawh a, mi 30,000 chuangin hliam an tuar niin a sawi.

UN thupuangtu, Ste­phane Dujarric chuan kum 2014, January 1 aṭanga kum 2015, April thla tawp thleng khan Iraq ramah tualchhung buaina avanga mi tam tak an thih bakah, mihring dikna chanvo pawh nasa taka palzut a ni, tiin a sawi.

UN Assistance Mission for Iraq (UNAMI) leh UN High Commissioner for Human Rights-in report an tihchhuah dun chuan Iraq buaina avang hian civil mi maktaduai 2.8 chuang an tlanchhia a, an zingah hian naupang maktaduai 1.3 vel an tel tiin a tarlang.

Report chuan Iraq rama Islamic State (IS) fir­fiakte awp rama mipuite dinhmun chu a hrehawm hle tih a tarlang bawk a, Yezidi hnam mi 3,000 chuang zet chuan firfiakte tihnawmnah hi an tuar mek a ni, a ti.

Kum 2014 June thlaa IS firfiak leh Iraq security force-te inbeihna nasa tak avangin Iraq ram chhung dinhmun hi a chhe hle a, tun thlengin ram chhung hmun hrang hrangah pawikhawihna hi a thleng chhunzawm reng a ni.

IS firfiakte hian Iraq hmarlama khawpui pawi­mawh, Mosul leh a chheh­vel bial eng emaw zat chu an thuhnuaiah an dah mek a ni. Hetihlai hian Iraq security force-te chuan IS kut aṭanga an ram lak let tum hian beihpui an thlak mek a ni.

US kaihhruai ṭangrual pawl pawhin thlawh­theih­na hmangin Iraq leh Sy­ria-a IS hmunte chu an beih chhunzawm reng a, Combine Joint Task Force-Operation Inherent Resolve thuchhuah chuan Thawhṭanni khan fir­fiakte hmun 67 chu thlawh­theihna hmangin bomb a ni a, IS ho motor-te an kah­chhiatsak bawk tiin a sawi.