Myanmar sipaiten an beihnaah zirlai 19 an thi

Myanmar sipaiten Rakhine state-a air strike an neihnaah zirlai naupang 19 vel an thi niin armed group, Arakan Army (AA) chuan Inrinni khan a sawi.

AA thupuangtu, Khaing Thukha sipaiten Zirtawpni zanlai pelh hnu lawkah Kyauktaw khaw huam chhunga private high school pahnih, Pyinnyar Pan Khinn leh A Myin Thit Private High School an bomb tih sawiin, zirlai 19 thite chu kum 15-17 inkar an ni tih a sawi. Hliam 20 an awm tih an sawi bawk. Myanmar Now chuan zirlai mut laiin sipai thlawhtheihna chuan bomb, pound 500-a rit pahnih chu sikulah hian a thlak niin a tarlang. He thil thleng chungchangah hian sipai lam chuan sawi engmah an la nei lo.

UNICEF chuan sikul beih a ni chu a dem thu sawiin, rawng taka chetna thleng chuan Rakhine state buaina chu a tibelhchhah zel a ni, tiin naupang leh chhungkua chu a tuartute an ni tih a tarlang.

Kyauktaw hi Mandalay khawpui chhim thlang lam, km 250 vela hlaa awm niin nikum February thla khan AA hian sipai kut aṭangin an la a ni.