Eurozone hruaitute'n Greece puih an remti

Leiba avanga talbuai mek, Greece ramin an ram leiba laka khaichhuahna tura rawtna a siamte chu eurozone hruaituten hun rei tak an sawiho hnuin, nimin khan an inrem.

European Council President Donald Tusk chuan, "Euro summit chuan lungrual takin inremna an siam thei ta a ni. Inremna siam a nih tak avangin sum lama Greece harsatna tawhte chu puih chhunzawm a ni ang," a ti. Hei hi kum 2010 aṭanga eurozone-in leiba lak aṭanga khaichhuak tura Greece a puih vawi thumna tur a ni.

Eurozone-in leiba laka Greece khaichhuahna tura rawtna a siam hmasak chu Greece mipuite'n vote lain an hnawl a, hemi hnu hian Greece Prime Minister Alexis Tsipras chuan an ram rawtna siam chu eurozone ngaihtuah tur hian a thehluh leh a ni. Pathianni khan Greece rawtna siam thar hi ngaihtuahin, zan lam thlengin an ngaihtuah zui a ni. Eurozone hruaitute hi Greece chungchangah hian ngaihdan in ang lo awm mah se, rei tak an sawiho hnuah nimin khan inremna an siam.

EU official-te chuan Greece PM Tsipras hian sum puktir tute rawtna siamte chu a pawm a, mahse Germany-in a leiba rulhna tura sorkar thil neihte hralh tura phutna erawh chu a hnawl leh niin an sawi.

Slovenia Prime Minister Miro Cerarsaid chuan eurozone-a Greece a awm chhunzawm zel theihna turin inremna an siam thei ta tih a sawi. Eurozone hian puih remti ta lo se, Greece hi sum lamah a tlachhe mai dawn a, eurozone aṭanga chhuakin, an ram pawisa pawh a hrana a siam ve leh a ngai dawn a ni.

Inremna an siam theih avangin, Greece pawhin an leiba laka khaichhuak tur, eurozone ngenna angin sum inrenchemna turah dan khauh zawk a siam ve a ngai dawn a ni. Greece sorkar chuan labour reform leh pension, VAT leh chhiah lak bakah privatisation chungchangah dan khauh zawk a siam ang.