Ruihhlo tawlhru pawl hotu jail aṭangin a tlanchhuak

Mexico rama ruihhlo tawlhru ṭhin pawl, Sinaloa Cartel hotu Joaquin 'El Chapo' Guzman chu kar kalta Inrinni khan jail-a leiverh aṭangin a tlanchhuak.

Guzman hian ruihhlo tawlhruk chungchangah US leh Mexico-ah thubuai eng emaw zat a nei. Kum 2014 February 22 khan man a ni a, Mexico City bula Altiplano tan-inah dah a ni.

Kum 59 mi Guzman hi jail-a hmuh a nih hnuhnun ber chu Inrinni zan dar 9 vel khan a ni a, a hnuah hmuh zui a nih tak loh avangin jail thuneitute'n a tanna cell an endik a, hetah hian a inbualna bul chhuata 50 cm square-a awng an hmu ta a ni.

Guzman-a cell aṭanga lei verh an hmuhchhuah hi km 1.5 zet thui niin, jail piaha in sak lai hnuaiah a chhuak a ni. Inbualna pindan chhuat awng hian a hnuaia leiverh hi a zu pawh a, Guzman hi leilawn hmangin awng a siam aṭang hian a hnuaia feet 30 vela thuka leiverhah a chhuk thla nia sawi a ni bawk.

Kum 1993 khan Guzman hi Guatemala-ah man a ni a, kum 20 tang tura thiam loh chantir ni mah se, jail aṭang hian a tlanchuak a, kum 2014 khan man a ni leh thei ta chauh a ni.

Guzman-a pawl, Sinaloa Cartel hian Mexico leh US ramri kaltlang hian ruihhlo, cocaine, methamphetamine leh marijuana tawlhrukna atan lei an verh ṭhin a, an leiverhah hian boruak leh eng lakluhnate pawh ṭha takin an siam ṭhin.

Inrinnia a tlanchhuahna leiverh-ah pawh hian boruak lakluhna an siam bakah, a chhung tihenna tur light te pawh a awm vek a ni.