Cambodia parliament-in NGO draft law a pass

Cambodia parliament, National Assembly chuan eptute'n an boycott chungin Associations and Non-Governmental Organizations (NGO) draft law a pass.

Rorellai, Cambodian People's Party (CPP) member 68 chuan Prime Minister Hun Sen hoin bill hi an thlawp a, hetihlai hian eptu pawl Cambodia National Rescue Party (CNRP) member 55-te chuan session hi an boycott thung.

National Assembly-a dan pass tur hian vote 62 hmuh a ngai a ni.

Deputy Prime Minister Sar Kheng chuan an ramah association leh NGO 5,000 vel an awm mek tiin a sawi.

Assembly-a bill an sawihonaah Deputy PM chuan, "He dan siam tur hi association leh NGO te zalenna hrek tumna a ni lo a, mahse pawl hrang hrangte dikna chanvo leh zalenna te venhimna tur zawk a ni. NGO leh sorkar inkara thawhhona ṭha zawk a awm theihna tur a ni," a ti.

Draft law sawiho a nih lai hian National Assembly kawtah human rights leh NGO activist-te chuan bill siam tum hi duh lohin lungawi lohna an lo lantir. Activist-te chuan bill siam an tum hi NGO leh association-te zalenna rahbeh sak tumna niin an ngai.