Zirna atana sum tam zawk dah turin Malala-in a ngen

Nobel Peace Prize dawngtu, Pakistan tleirawl Malala Yousafzai chuan khaw­vel hmun hrang hranga naupangte'n a thlawna lehkha an zir theih­­na turin, zirna lamah sum tam zawk dah turin khaw­vel ram hruaitute a ngen.

Naupangte'n lehkha an zir vek theihna tura a beih avanga kum 2012, October thlaa Taliban firfiakte kut tuartu, Malala-i hian a dam ṭhat leh hnuah pawh naupangte'n lehkha zir tura dikna chanvo an neihte humhalh sak turin a bei chhunzawm zel a ni.

Malala-i chuan khaw­vel ram hrang hrang hruai­tute chu zirna kalpuina atana sum tam zawk dah a, kumtin dollar tlukleh­dingawn 30 tal dah turin a ngen. "Kan hmalakna hi kan tawp mai dawn lo. Naupang zawng zawngte'n lehkha an zir theih hma chuan kan aw kan chhuah zel dawn a ni," a ti.

Khawvel pumah hian naupang school kal lo mak­taduai 58 vel an awma chhut a ni. Ram tam takin zirna tihhmasawnna atana budget an dahte tipung mah se, naupang school kal lo zat hi an la pung zel zawk a ni.

Malala-in NGO a din, Malala Fund chuan May thla khan ram 100 vel­in kum 2030-ah an ram chhunga primary leh secon­dary education chu a thlawn veka kaltir an tum thu an sawi tawh tiin a tarlang.