Eurozone-in Pathianni thleng hun a pe

Eurozone chuan leiba avanga buai mek, Greece ram khaichhuahna tura inremna thar siam turin Pathianni thleng hun a pe.

Greece mipuite chuan eurozone-in rawtna a siamte chu an vote hmangin an hnawl a, hei vang hian Greece chuan rawtna thar a siam chu eurozone hruaitute hmaah a pharh leh dawn a ni.

Thawhlehni khan Greece chung­chang ngaihtuahin Brussels-ah eurozone emergency meeting neih a ni a, Greece Prime Minister Alexis Tsipras chu an ramin rawtna a siam tharte pharh tura beisei a ni. Mahse PM Tsipras hian rawtna kimchang hi a pharh theih loh avangin hun an pek belh leh a ni. Tsipras hian nimin khan Strassbourg-a European Parliament-ah thu sawiin, Greece ruahmanna siamte a sawilang nghal.

European Union President Donald Tusk chuan Greece hnena fund pe thar leh tur chuan Ningani-ah Greece sorkarin an ram sum dinhmun siamṭha tura ruahmanna a siam kimchang chu a thehluh a ngai dawn a ni, a ti. Hei hi EU ram 28 hruaitute chuan Pathianni hian an zirchiang ang a, thutlukna an siam ang.