Iran nuclear deal la siam thei lo

Iran nuclear deal siam tura Vienna-a Iran leh world power ram paruk-te inbia chuan inremna an la siam thei lo.

Inremna siam tura an hun tiam ṭum hnihna chu Thawhlehni khan a tawp a, mahse an hun tiam chhung hian inremna hi an la siam thei lo a ni.

World power ram paruk, P5+1 (Russia, China, France, Britain, US +Germany) leh Iran hian inremna siam tura hun tiam chu liam mah se, inbiakna hi an chhunzawm zel dawn a ni.

P5+1 hian Iran hian nuclear ralthuam a siam mai hlauhthawn avangin nuclear program a neihte chu titawp turin an phut a, Iran chuan nuclear program a kalpui mek chu a muanawm zawng a ni tiin, inremna siam dawn chuan ramdangte'n an ram an hrekna chu hlip turin a phut let thung. Hei bakah UN-in ralthuam tenau leh ballistic missile lakluh leh thawnchhuah a khapna chu hlip turin an phut tel bawk.