IS-te'n school naupang 111 an rubo

Islamic State (IS) firfiakte chuan Iraq hmarlama Mosul khawpui district hrang hrang aṭangin school naupang 111 an ru bo a, an naupang rukbote hi an pawlin pawi an khawihnaah hmathehah hman an tum nia sawi a ni.

Naupang an rukbote hi kum 10-15 inkar an ni a, an thluak suk sak tumin IS educational and military centre-ah dah an ni tih Iraq Arabic news channel, AI Sumaria chuan a tarlang. Firfiakte hian naupangte an rukbo dawna anmahni lo dangtu, mi 78 te an man tel bawk.

Kurdish official-te chuan kum khat liamtaa IS-te'n Mosul khawpui an lak hnu khan naupang 1,420 vel an ru bo tawh tiin an sawi. Heng naupangte hi military training pein, an chhawr zui niin an sawi.

Kurdistan-a Democrat Party thu­puang­tu, Saeed Mamuzini chuan Mosul hmarchhak lama Bashiqq khuaa inbeihnaah Kurdish fighter-te'n firfiakte an beih avangin, IS hian an pawl mi leh sa ngei mi 15-te chu a tihlum tiin a sawi. Heng mi 15 te hi naupang training an pekte hi an tihhlum tir tih a sawi bawk.

Iraq security official-te chuan Diyala province leh al-Anbar province aṭangin firfiakte hian naupang 500 chuang an rubo tawh tih an sawi.