US Army in sipai titlem dawn

US Army chuan kum hnih chhungin ramchhung leh ram­pawna sipai awm zat chu 40,000 a tihtlem a tum.

Ruahmanna thar hnuaiah, US Army hian kum 2017, September 30-ah sipai awm zat 490,000 chu 450,000 ah tihhniam a tum a ni. Hei bakah han civil mi a chhawr 17,000 pawh tihtawp a tum bawk. Ruahmanna kimchang erawh chu kar tawp lamah official-a tihchhuah a ni ang.

Pentagon chuan kumin Feb­ruary thla khan kum 2016 atana budget a tihniam avangin hei hi a thlen rin lawk a ni. Sipai tihtlem hna hi engtik aṭanga kalpui ṭan nge a nih dawn sawi chian ni lo mah se, USA Today chuan kumin October thla aṭanga ṭan a ni dawn tiin a sawi.

Iraq leh Aghanistan-a firfiakte do tura sipai a tirh lai kha US Army-in sipai a neih tam lai ber niin, kum 2012 khan sipai 570,000 a nei a ni. Mahse roreltu lamte'n sipai lakbelh aiin drone leh hmanrua dang ngaihtuah tura an nawr avangin, Pentagon hian a sipai zat hi a tihniam dawn ta a ni.

America sipai awm zat hi tihhniam ni dawn mah se, khawvela armed force lian ber a la ni dawn tho a ni.