Pakistan-in JuD dan pawna hnawl a tum lo

Pakistan sorkar chuan Mumbai khawpui beihnaa a ruahmantu ber nia puh, Hafiz Saeed-a kaihhruai Jammat-ud-Dawan chu dan pawna hnawl a tum lo. Sorkar chuan JuD hi firfiaka a chetna le dan pawna awm mek, Lashkar-e-Toiba nen an inzawm tih finfiahna a awm lo tiin a sawi.

Minister for states and frontier region, Gen Adbul Qadir Baloch chuan UN Security council chuan resolution-ah JuD chu LeT hming thar angin an ziak a, mahse an ṭanchhan tinghet tur hian Pakistan hnenah finfiahna engmah a pe lo a ni, a ti.

Baloch chuan JuD chu Anti-Ter­ro­rism Act (ATA) Section 11-D hnuaiah kum 2003, November 15 aṭang khan enthlak a ni a, firfiaka chetnnaa a in­hnam­hnawih ngei tih finfiahna a awm chauh­in ATA Section 11-B hnuaiah dan pawna hnawhchhuah a ni dawn tih a sawi.

Sorkar chuan firfiaka chetnaa inhnamhnawih nia rinhlelh chu thla ruk chhung enthlak turin a dah tir thei a, a hun hi pawhsei theih a ni bawk.

JuD hi mi harsatna ṭanpuina leh khawtlang siamṭhat hna thawhnaah te, hospital, clinic, school siamnah te, ambulance service leh sakhaw zirna-in dinna kawngahte a thawk ṭhin tih a sawi. Kum 2008-2010 khan an pawl office hi khar sak an ni a, mahse Lahore High Court thupek angin hawn tir leh an ni.

UN chuan JuD hi firfiak pawl list-ah a telh a, an hotu Hafiz Saeed lu manah pawh US dollar makataduai 10 a phal a ni. Hetihlai hian Pakistan ram chhungah JuD hi zalen takin a la chetla thei reng a ni.