Uganda president-in kea kal turin a in a chhuahsan

Uganda president Yoweri Museveni chuan kar kal ta Inrinni khan ni rukchhung ramhnuaiah kea kal turin a in a chhuahsan. 

Kum 1986-a Idi Amin leh Milton Obote thuneihna an laksak ṭuma, a sipaite nen ramhnuaia an kawng zawh chu an zalenna hriatrengnan a zawh leh dawn nia tarlan a ni. Kampala khaw chhak lama awm Galamba khua aṭangin ramhnuai pan hian Museveni leh amah zuitute chu an kal chhuak ṭan a; January 10 thleng ke hian an kal dawn a, Birembo hmun thleng an kal ang.

An kal tawpna tur hmunah hian kum 1986 khan Museveni leh a sipai­te chuan Obote thu­neihna paihthlak tumin indona nasa tak an hmachhawn tawh a ni. Museveni thil tih hi mi tam takin an sawisel a, nakkuma inthlan a awm dawn vanga hmingṭhat duhah an puh bawk. An ram pop star Bobi Wine chuan chhiah petute sum tih hekna mai a nih thu a sawi. Museveni leh amah zuitute hi kilometre 195 (mel 121)-a thui kein an kal ang.