Iraq-in IS firfiakte thi turin an chungthu rel

Iraq court chuan Islamic State (IS) firfiak pawl member nia hriat, mi 24-te chu nikum June thlaa Iraq sipai tam tak thahnaah inhnamhnawihah puhin thi turin an chungthu a relsak.

Nikum khan IS firfiakte'n Tikrit khaw bula sipai hmunpui, Camp Speicher beiin, sipai 1,700 dawn an kaphlum. Heng zinga a tam zawk hi Shia Muslim an lak tharte an ni. He pawikhawihna thleng hi IS chuan a thlalak bakah a video-te internet lamah an thehdarh zui bawk.

Kumin March thla khan Iraq sipaite chuan firfiakte kut aṭang hian Tikrit hi an la let tawh a, hemi hnu hian sipai camp beihnaa inhnamhnawiha rinhlelh mi eng emaw zat an man a ni.

Tikrit-ah hian a ruala mi tam tak an phumna hmun pali hmuhchhuah a ni bawk a, ruang an phumte hi forensic team-te chuan ruang hmuhchhuah 470 te an enfiah mek bawk.

Baghdad court-in thi tura an chungthu a relsak mi 24-te hi Iraq ram mi vek an ni. Thiam loh chantirte hian an puhna chu thu dik lo tiin an sawi.