Malala-in Pakistan a tlawh duh chuan kan pui ang: Sharif

Pakistan Prime Minister Nawaz Sharif-a chuan Nilaini khan Nobel Peace Prize dawngtu, Malala Yousafzai-i chu Oslo-ah a hmu.

Malala Yousafzai-i hi Pakistan rama hmeichhe naupangte lehkha zir turin dikna chanvo an neih thute a campaign ṭhin avangin, Taliban firfiakte chuan kum 2012, October khan tihhlum tumin an bei a ni. A luah hliam na tak tuarin England-ah enkawl tura hruai a ni a, hun eng emaw chen enkawl a nih hnuah ṭha taka damchhuakin England-ah hian a awm zui ta rih a ni.

Kum 2013, September thla khan UN General Assembly neih rualin hun rei vak lo chu PM Sharif leh Malala-i te hi an lo inhmu tawh a, mahse Nilainia Oslo-a meeting an neih hi Malala-in Taliban-te kut a tawrh hnua official-a meeting an neihna hmasa ber a ni. Pakistan PM Sharif-a chuan Malala-i hnenah Pakistan rama kal a duh a nih chuan a kaihhruai sorkarin a puih tur thu a hrilh.

Malala-i chuan, "Prime Minister chuan Pakistan chu ka tan a inhawng reng tih min hrilh a ni. Kei pawhin Pakistan mi ka nih angin Pakistan rama kir leh a, ka theih ang anga mipuite ṭanpui hna thawh chu ka mawhphurhna a nih thu pawh ka hrilh let ve a ni," a ti.