Syria raltlan mtd 4 an chuang tawh: UNHCR

United Nations High Commis­sioner for Refugees (UNHCR) chuan Syria tualchhung buaina avanga raltlan chu maktduai 4 an tling tawh tiin a sawi. Thla sawm kalta chhung khan mi maktaduai 1 an tlanchhe hman a ni, a ti.

Syria raltlan zinga tam zawk hi an ṭhenawm ramah an tlanchhia. Turkey ramah tlan lut an tam ber a, mi maktaduai 2 vel an tlan lut tawh tiin UNHCR report chuan a tarlang.

UN agency chuan ram pawn lama mi maktaduai 4 chuang an tlanchhiat bakah, Syria ram chhungah hian buaina thleng vanga inhumhimna zawnga tlanchhia hi maktaduai 7.6 vel an awm bawk niin a sawi.

Syria raltlan zinga 249,726 chu Iraq-ah an tlanchhia a, Jordan-ah mi 629,128, Egypt-ah 132,375 leh Lebanon-ah 1,172,753 an awm bawk. Report-ah hian Europe rama inhum­himna diltu, mi 270,000 telh an ni lo.

UN High Commissioner for Refugees António Guterres chuan, "Hei hi hun rei tak chhunga ram pa­khat aṭanga raltlan an tam ber ṭum a ni. Khawvel ram hrang hrangte'n an puih a ngai a ni," a ti.

Syria tualchhung buaina thleng hi a kum nga-na a ni tawh a, mahse buaina chin­fel lam an la hnaih lo hle a, nitinin him­na zawnga tlanchhia an la pung zel a ni.

UNHCR chuan tun anga raltlan hi an punchhoh zel chuan, kumin kum tawpah chuan mi maktaduai 4.27 an tling thei dawn niin a tarlang.