Bangladesh PM hlui Hasina vote thlak phalsak dawn lo

Bangladesh Election Commission (EC) chuan an ram prime minister hlui, Sheikh Hasina identity card chu a 'lock' sak tih sawiin, nakkum February thlaa an ram inthlanpui neih turah pawh vote a thlak phalsak a ni dawn lo.

EC secretary Akhtar Ahmed chuan an ram mi leh sa tu pawh, an national identity card (NID) 'lock' sakte chuan ram pawn lam aṭangin vote an thlak thei lo tih sawiin Hasina NID pawh 'lock' a ni, a ti.

Hasina laizawn Sheikh Rehana, a fapa Sajeeb Bazed Joy leh a fanu Saima Wazed Putul te NID pawh 'lock' sak an ni bawk nia sawi a ni. Anni bakah Hasina security adviser hlui Tarique Ahemd Siddique leh a nupui bakah an fanu pawhin vote an thlak thei dawn lo.

Ahmed chuan chhan hrang hrang avanga ram danga tlanchhia leh awmte chu NID dan sak an nih loh chuan ram pawn lam aṭangin vote an thlak thei reng tih a sawi.

Hasina kaihhruai Bangladesh Awami League sorkar chu kum 2024, August 5 khan zirlai pawl buatsaiha sorkar policy duh lohna lantir nawrh huaihawta tharum thawhna a thlen zui hnuah paihthlak a ni. Hasina pawh India ramah a tlanchhe zui bawk. Hemi hnu hian Muhammad Yunus chu sorkar lailawk dinah a hotu, chief adviser atan ruat a ni.

Kum khat chuang sorkar lailawk hi a ding tawh a, Yunus chuan thla hmasa khan an ram inthlanpui chu nakkum February thlaah neih a nih tur thu a puang a ni. Mahse, anti-terrorism law hnuaiah Hasina party, BAL hi inthlan an chuh khap a ni. Hei bakah BAL student wing, Bangladesh Chhatra League (BCL) chu firfiak pawlah puan a ni bawk.

Hasina hian July, 2024-a a kaihhruai sorkar laka lungawi lohna lantira nawrh huaihawtte beih an nih chungchangah International Crimes Tribunal-ah thubuai a nei mek bawk a ni.