Pakistan leh Saudi Arabia-in inremna ziak

Pakistan leh Saudi Arabia chuan Nilaini khan defence lama thawh dunna tur inremna an ziak.

‘Strategic Mutual Defence Agreement’ hi Riyadh-a Pakistan prime minister Shehbaz Shariff a awm laiin ziah a ni. Inremna an ziahah hian a eng ram zawk zawk pawh beih a nih chuan an ram pahnih beihna angah an ngaih tur thute pawh an ziak lang a ni. Ram pahnihten thuchhuah inṭawm siamin, an inremna ziah chuan security lama thawh dunna huang zau zawk siam zel leh khawvel huap pawha boruak muanawm a awm theihna tura theihtawp an chhuah duh zia a tilang a ni, an ti.

Pakistan leh Saudi Arabia hian kum rei tak chhung sumdawnna leh sipai lamah inzawmna ṭha tak an lo nei tawh a ni. Kum 1967 aṭang khan Pakistan hian Saudia Arabia armed force 8,200 chuang training a pe tawh a, ram pahnih hian joint military service pawh ṭum eng emaw zat an lo nei tawh bawk.

Saudi Arabia ram a tlawh hmain Pakistan PM hi Qatar khawpui, Doha-a Organisation of Islamic Cooperation (OIC)-in Arabi-Islamic summit a buatsaihah a tel bawk a ni. He summit-ah hian September 9-a Israel-in Doha-a Hamas hruaitute a bei chu an dem thu an sawi.