Yemen-ah UN-in inkahhai a puang

United Nations chuan tualchhung indo thlen mekna Yemen ramah nimin khan inkahhai a puang.

UN chuan indona tuartu civil mite hnena chhawmdawlna pek an nih theihna atan inkahhai hi a puang a, July 17 thleng a awh ang.

Yemen ramah hian Houthi helte'n sorkar paihthlak tumin an bei a, khawpui hrang hrangah sorkar sipaite nen an inbei chhunzawm reng a ni. Saudi Arabia kaihhruai Arab ram ṭangrualte chuan thlawhtheihna hmangin helho lakah hian beihpui a thlak mek bawk.

UN thupuangtu, Ste­phane Dujarric chuan hun rei tak helho leh sipaite an inbeih tawh avangin civil mite'n an tuar nasa tawh a, an inbeih chhunzawm reng avangin chhawmdawlna pawh pek hleih theih loin an awm a ni, a ti. Hei vang hian civil mite ṭanpui turin inkah­hai puan a ngai a ni, a ti.

Yemen tualchhung indo­na vang hian a ram mipuite zinga makta­duai 21.1 chuang chu chhawm­dawl an ngai tawh nia sawi a ni a, hei hi Yemen mipui zinga 80% a tling. Mi maktaduai 13 vel chuan ei tur an tlachham dawn tawh nia saiw a ni.

Houthi helho hian an ram khawpui Sanaa chu nikum September thla khan an la tawh a, hmun dang tam tak pawh an thuhnuaiah an dah tawh bawk.

Ningani khan Saudi Arabia thlawhtheihnate chuan Yemen hmarlam, Saada province-a Houthi hel hmun pawimawh tak chu vawi tam tak an kap leh. Hei bakah hian Hajjah province-a hotel pakhat pawh an kap bawk.

UN chuan kumin March 26-a Yemen sorkar puia Saudi sipaite'n helho laka beihpui an thlak aṭang khan mi 5,100 chuang an thi tawh a, an zinga mi 1,582 chu civil mi an ni, a ti.