South Carolina-a Confederate flag la thla

US South Carolina state khaw­pui, Columbia, State House-a Confe­derate flag inzar chu nimin khan lak thlak a ni.

South Carolina Senate-in Confe­derate flag lak thlakna tur bill a pass hnuah, Ningani khan House of Representative-ah ngaihtuah a ni. Hun eng emaw chen an sawiho hnu­ah House pawhin flag lak thlakna hi a remti a, hemi hnu hian Governor Nik­ki Haley hnenah thawn nghal a ni.

Governor office chuan Haley-i'n a pawmpuina hming a ziah hnan hnuah, an ram sanaa Zirtawpni chawhma dar 10-ah flag hi lak thlak a ni dawn tih a sawi.

Congress-ah Republican hruai­tute chuan South Carolina state chauh ni lo, US ram puma Confederate flag la zarte pawh lak thlak dan ngaihtuaha sawiho leh an ngen.

June thlaa Charleston khuaa mihang biak-in beih a ni leh, biak-in inkhawma mihang pakua kahhlum an nih aṭangin Confederate flag hi mi tam takin an ngaimawh a ni. He flag hi American Civil War (1860-65) hun laia America chhim lam, mihang sala chhawr thlawptu lamte'n flag-a an hman a ni. Mi tam tak chuan he flag hian sal neih thlawpna lantirnaah an ngai a, mahse ṭhenkhat chuan US chanchin leh a thil tawnte tarlanna pawimawh tak niin an ngai thung.

Flag lakthlakna tur bill hi House-ah darkar 13 chhung zet sawiho a ni a, Republican lam chuan hmanhmawh taka kalpui rih lo rawt mah se an rawtna hi hnawlsak a ni. Vote lak a nih hnuin bill thlawptu lamah vote 93 tlain, a duh lo lamah vote 27 a tla. Flag lakthlak duh lotu lam chuan he flag hian sal inchhawr lam ni loin, civil war laia loneitute'n an dikna chanvo venghim tura an beihna lantirna leh hriatrengna a ni, an ti.