Philippine-ah eirukna duh lohna lantir

Philippine khawpui, Manila-ah nimin khan tuilian venna tur project thawhnaa eirukna lian tham tak awm duh lohna lantirin mi sing telin kawng an zawh. He project tihchingpennaah hian roreltu, official leh sumdawng liante an inhnamhnawih niin an puh.

Nawrh huaihawtnaa buaina chhuak veng turin police leh sipai ṭhahnem tham tak duty tir an ni. Tun hnaia eiruk duh lohna lantira nawrh huaihawta mipui pungkhawm tamna ber zinga mi nia hriat a ni. Nawrh huaihawttute chuan sorkar official, legislator leh construction company-te eirukna nasa tak thleng chu an duh loin an haw hle tih an sawi a, hemi rual hian president Ferdinand Marco Jr. chu bang tura nawr an tum lo tih an sawi.

President Marcos hian kumin July thlaa thuchah a sawiah, flood-control project hrang hrangah eirukna nasa tak a awm thu a sawi chhuak a ni. A hnuah hemi chungchang chhui chiang turin independent commission a din bawk. President hian kum 2022 kum laihawla a office a luah ṭan khan, flood-control project hi 9,855, an ram pawisaa peso tld 545 (USD tld 9.5) man hu siam alo ni tih sawiin, heng hna thawhnaah hian eirukna a nasa hle tih a tarlang.

Project thawktu, construction company eng emaw zat neitu. Sarah leh Pacifico Discaya te nupa thil neih, luxury car leh SUV eng emaw zat media lamah pho lan chuan mipui a tithinur zual hle bawk. An thil neih zingah hian British luxury car, peso mtd 42 man pawh tel. An chhui zuinaa contract an hmuh theihna atan hian legislator leh public works official ṭhenkhatin sum tam tham tak an pek tir tihte hriat a ni a, senator pahnih chu ban an lo ni tawh a ni. He project-a eirukna nasa thlenga inhnamhnawiha puh hrang hrangte chu chhui mek an ni bawk. Legislator eng emaw zat inhnamhnawiha puh tel an nih avangin Senate president Francis Escudero leh House speaker Martin Romualdez te pawh an lo bang tawh bawk a ni.