Myanmar inthlanpuiah Suu Kyi-i party tel dawn

November 8-a Myanmar ram inthlanpui neih turah, eptu hruiatu Aung San Suu Kyi-i party, National League for Democracy (NLD) chuan chuh a tum. Hei hi kum 25 chhunga inthlanpuia an tel hmasa ber tur a ni.

Myanmar ram inthlanpui neih tur hi dik tak leh zalen taka kalpui a nih chuan, NLD hi an chet ṭhat hle beisei a ni. Suu Kyi-i chuan inthlanpuiah an chak a nih chuan, an party chuan an ram danpui chu a siamṭha dawn tih a sawi. Danpui an hman mekah hian ramdang mi laka fa nei chu an ram President chuh phalsak an ni lo. Suu Kyi-i hian pasal, British mi lakah fapa pahnih a nei a, hei vang hian President dinhmun hi a chuh thei dawn lo a ni.

Nimina Myanmar khawpui, Nay­pyitaw-a chanchin thar lakhawmtute a kawmnaah, Suu Kyi-i chuan, "NLD hi thlan tlin a nih chuan ram inpumkhatna ṭha siam chu ngaih pawimawh hmasak ber a ni ang. Kan rama hmasawnna thlen tur chuan politics, economy leh sector hrang hrangte dinhmun sawhngheh hmasak a ngai a ni. NLD kan sorkar chuan hengte hi kan ngai pawimawh ang," a ti.

Kum 1990 inthlanpuiah khan NLD hi hneh taka thlan tlin a ni. Mahse hetih laia thuneihna changtu, sipai sorkar chuan inthlan result hi pawm loin thuneihna a hlan chhawng duh lo a ni. Kum 2011-a sipai sorkar hnuaia inthlanpui buatsaihah khan NLD hi a tel ve duh lo.

Kum 2011 khan sipai sorkar thuneihna hi civil sorkarin thlak a ni a, mahse rorellai party Union Solidarity and Development Party (USDP)-a hruaitu tam zawk chu sipai hotu an la ni zui tho a ni. November thlaa inthlanpui neih turah pawh hian NLD leh USDP hi inbitum ber tura ngaih an ni.