Yemen-ah inbeih chhunzawm

Tualchhung indo thlen mekna, Yemen ramah chuan UN-in inkahhai puang mah se, helho leh sorkar sipaite chu inremna palzutin an inkap chhunzawm leh.

Yemen sorkar thlawptu, Saudi Arabia kaihhruai Arab ṭangrual pawl chuan Yemen khaw­pui, Sanaa-a Houthi helho awmna hmunte chu thlawh­theihna hmangin an bomb chhunzawm leh. Chhim thlang lama Taiz khawpuiah helho leh Yemen sipaite an inkap leh bawk.

UN Security chuan tual­chhung buaina tuar­tu civil mite ṭanpui leh chhawm­dawl an nih theihna atan kar kalta Zir­tawpni zan aṭangin inkah­hai a puang. UN hmalakna hi Yemen sorkar leh helpawlte chuan an thlawp thu sawi mah se, pawl pahnihte hian inremna hi an palzut nghal a ni.

Kumin March thla aṭang khan Saudi Arabia kaihhruaiin Houthi helte lakah beihpui thlak a ni a, mi 3,000 chuang an thi tawh tiin UN chuan a tarlang.

Hun rei tak tualchhung buaina a thlen tawh vangin mipuite dinhmun pawh a chhe tawh hle a, UN chuan Yemen mipui zinga 80% aia tam, mi maktaduai 25 zet chu chhawmdawl ngaia an awm thu a sawi.