Israel-in Palestinian tang a chhuah

Israel sorkar chuan Palestinian mi a hren, chhuah phuta ni 56 zet chaw ngheia nawrh huaihawt chu Pathianni khan a chhuah zalen ta.

Palestinian mi, Khader Adnan (37) hi Israel 'administrative detention policy' hnuaiah man a ni a, kum khat chuang zet thubuai siamsak lohin hren a ni. Adnan hi West Bank-a cheng a ni a, vawi eng emaw zat Israel sipaite'n an lo man tawh a ni. Kum 2014 khan Israel mi pathum rukbo leh thah an nih kaihhnawihah man a ni a, mahse thubuai siamsak loin hren zui a ni.

Khader Adnan hi Islamic Jihad senior member a ni. He pawl hi vawi tam tak Israel mite chunga pawi­khawihna thlen tawhah puh a ni.

Israel administrative detention policy hnuaiah hian an mi rinhlelh-te chu thubuai siamsak kher loin tiam chin awm loin an hreng thei a ni. Hei hi human rights group hrang hrangte'n an sawisel nasa hle.

Adnan hian thubuai engmah siamsak a nih loh avangin chhuahtir turin Israel a phut a, a thil phut nawrna atan chaw a nghei ta a ni. Ni rei tak chaw a nghei hman avangin a taksa pawh a chau hman hle a, June 28-a Israel sorkarin chhuah zalen a remtih tak hnu khan a chaw nghei hi a titawp.

Nimin khan Israel ambulance hmangin Adnan hi Palestinian medical service kutah hlan a ni.