IS-te'n Cairo-a Italian consulate an bei

Egypt khawpui, Cairo-a Italian consulate bulah kar kalta Inrinni zing khan bomb chak tak tihpuah a ni a, mi 1 a thi a, mi dang 8 in hliam an tuar.

Bomb hi zing dar 6.30 velah consulate hnung lam gate bula tihpuah a ni a, a bul vela bang leh darthlalang te pawh a chhe nasa hle.

Islamic State (IS) firfiak pawl chuan Italian consulate beitu an nih thu nimin khan an sawi a, mahse an pawl tih a ni ngei em tih erawh finfiah a ni lo. IS chuan sorkar hmun pawimawhte beih chhunzawm zel an tum thu sawiin, Muslim-te chu heng hmun leh a chhehvel aṭanga inthiarfihlim turin an hrilh nghal.

Italy Foreign Minister Paolo Gentiloni chuan Cairo leh Egypt hmun hrang hranga Italy hmun pawimawhte chu venhimna khauh zawk pek an tum thu a sawi.