North Korea hmelma lian ber US : Kim Jong Un
North Korea hotupa Kim Jong Un chuan an party meeting an neihnaah an ram hmelma lian ber chu United States a nih thu a sawi a, nuclear ralthuam chu an ramin siam belh a tum thu pawh a sawi bawk.
Hmanni lawk khan US President-elect Joe Biden-in Kim chu mi tawrawt tia a sawi vangin Kim Jong Un hian hetiang hian a sawi niin a lang. Kar liam taa meeting an neihnaah khan Kim chuan an ram chuan foreign political activity hrang hrangte a ngaihpawimawh tur thu leh US el pha reng tur a nih thu a sawi a, US chu an ram chuan a tihtlawm tur thute leh nuclear raltuam lama an ramin insawrbing an tum thute pawh a sawi tih Korean Central News Agency chuan a tarlang.
"US-ah hian tupawhin rorelna chelh sela, US-in North Korea a endan chu a dang dawn chuang lo. Chuvang chuan US hi kan ram hmelma a ni a, nuclear ralthuam pawh nasa takin kan siam belh zel ang," tiin Kim chuan a sawi. Multi-warhead missile, underwater-launched nuclear missiles, solid-fueled long-range missiles leh spy satellites-a hmalakna hrang hrangte pawh meeting-ah hian a sawi bawk. Kim thusawi hi US chuan nimin thleng khan a la chhang let lo a, Biden campaign thupuangtu chuan hemi chungchang an zawhna hi a chhang duh rih lo.
Nuclear siam belh te sawi lang mah se Kim chuan inhuatna leh inhmelmak avanga nuclear hmanga North Korea an rawn bei a nih hma loh chuan, an ram siam nuclear ralthuamte chu hman mai a tum bik loh thu a sawi.
US kap thleng thei tur ralthuam an siam thu North Korea hotupa chuan a sawi bawk a, North Korea chuan kilometre 15,000 (9,320 mile) kap thleng thei tur raltuam an neih thu sawiin, hetiang hi indona atana hman a awlsam dawn bakah siam belh zel an tum thu pawh a sawi. Kar liam ta Inrinni khan Workers’Party-in meeting an nei a, he hunah hian Kim chuan nuclear technology, nuclear-powered submarine leh missile hrang hrang ṭha tawk tak siam belh zel an tum thu kal kawmte hmaah a sawi a ni.
North Korea-in nuclear ralthuam 60 a nei
Kum 2018 khan South Korea chuan an ram ṭhenawm North Korea-in nuclear ralthuam 60 vel lai a neih thu a tarlang.
Kim-a'n US-a vauna thu a sawi chungchangah hian South Korea khawpui Seoul-a Asian Institute for Policy Studies vice president, Choi Kang chuan "US hnenah hian Kim hian ramthuam ṭha an neih thu hi hrilh a tum ber a, chumi avang chuan dawhkan khat kila inbiakna neih a duh a ni," a ti.
"Kim hian Biden hi thawhpui awlsam tak a ni dawn lo tih a hriat vangin hetiang hian rem leh muanna ti derthawng thei zawngin a ṭawng a ni," tiin Choi Kang chuan a sawi bawk.