NKorea hotuin US nena inbe tura a inhawn thu a sawi

North Korea ram hotu, Kim Jong-un chuan US-in nuclear ralthuam siam lo tura a phutna chu a titawp a nih chuan, US nena inbiakna nei turin a inhawng tih a sawi.

Pathiannia Supreme People Assembly-a thu a sawiah Kim chuan, "United States hian nuclear ralthuam siam lo tura min nawr rengna hi titawp a, thil awmdan dik tak a pawm a, inrem taka awm dun a duh anih chuan, inbiakna neih duh lohna chhan tur kan nei lo," a ti. US president Donald Trump hriatrengna ngaihawm tak tak pawh a nei tih a sawi. President Trump term hmasaah khan Kim nen hian vawi thum an inhmu a ni.

Thla hmasaa White House-a Trump leh South Korea president Lee Jae-myung te inhmuh ṭum khan NKorea hotu nena meeting neih an duh thute pawh hi an lo sawi dun tawh bawk. Trump chuan, "Engtikah emaw chuan ka la hmu leh ang, ka lakah pawh a ṭha hle a ni," tiin a sawi. Kim chu North Korea-a roreltu zingah a la ṭha ber tih a sawi.

Kim hian an ramin hrekna hrang hrang tawk mah se an ram tichaktu zawk a ni, a ti. NKorea hi nuclear ralthuam leh ballistic missile programme a siam vangin United Nations chuan kum 20 dawn a hrek tawh a ni. Mahse, Kim chuan nuclear programme hi an ram beih tumtute laka invenna atana thil pawmawh a nihthu a sawi thung.