Indonesia thlawhtheihna kum 26-a upa a chesual

Indonesia thlawhtheina kum 26-a upa Boeing 737-500 series Sriwijaya Air Flight 182 chu kar liam ta Inrinni khan a thlawhchhuah aṭanga rei loteah, meter 23 (feet 75)-a thuk Java Sea (tuipui)-ah a tla nia hriat a ni.

Sriwijaya Air hi kar liam ta Inrinni khan Indonesia khawpui Jakarta aṭanga an ram huna tlai dar 2:36 ah a thlawk chhuak a, Indonesia khawthlang lama West Kalimantan-a Pontianak khuaa kal tur a ni. Mahse a thawlhchhuah aṭanga rei lote dar 2:40-ah biak pawh theih loh a ni nghal a, dan pangngai chuan Pontianak khua hi minute 90 kal a ni.

Indonesia search and rescue agency hotu Bagus Puruhito chuan Sriwijaya Air hi a bo hnu hian a signal aṭanga an chhui thu sawiin, hmun hnih aṭangin thlawhtheihna signal an hmuh thu a sawi a, thlawhtheihna part, mihring taksa peng leh passanger-te bungrua an hmu nual bawk tih a sawi. 

Inrinni zankhuain Sriwijaya Air zawn hna hi Indonesia search and rescue agency chuan an thawk a, nimin zing khan chhunzawmin an thil hmuhna chu tuipui a nih avangin duh angin a chhui hna hi an thawk chak thei lo a, hetichung hian thlawhtheihna pali leh lawng 10 chuangin tuipuiah hian a zawn hna an thawk mek a ni. 

Sriwijaya Air Flight 182 (SJY182)-ah hian passenger 50 an chuang a, heng zingah hian naupang pasarih leh nausen pathum an tel a, crew member 12 an chuang tel ve bawk. SJY182 hi mi 130 leng thlawhtheihna a ni a, a chetsual chhan hi hriatchian a la ni lo.