Indonesia leh EU-in trade deal ziak

Indonesia leh European Union chuan insumdawn tawnna tura inremna Comprehensive Economic Partnership Agreement (CEPA) chu kum 10 dawn an buaipui hnuah nimin khan an ziak thei ta.

CEPA hi EU in Southeast Asia ram a ziahpui pathumna a ni a, a hmain Singapore leh Vietnam chu inremna a siampui tawh a ni.

Bali-a inremna an ziahah hian EU trade commissioner Maros Sefcovic leh Indonesia minister of economic affairs Airlanga Hartarto ten an hming an ziak. An inremna hian sector hrang hrang a huam a, heng zingah hian electric vehicle, electronics leh pharmaceutical-te pawh an tel. Inremna an siam hmang hian EU aṭanga bungrua thawn luhah chhiah tam tak an chawi ṭhin aṭangin kum khatah USD mtd 708 vel an hum thei tawh dawn niin EU president Ursula von der Leyen chuan a sawi.

Kum 2016 aṭang khan Indonesia leh EU hi sumdawn tawnna kawnga inremna siam tur hi an inbe tawh a ni. Ṭum 19 inbiakna an neih hnuah, July thla khan Indonesia president Prabowo Subianto leh EU president Ursula te chuan Brussels-ah an inrem theih tak thu hi an puang a ni. Indonesia hi EU-in a sumdawnpui ram lian pangana niin, nikum khan an insumdawn tawnna hi USD tld 30.1 a tling pha. Inremna an siam theih tak avangin an insumdawn tawnna pawh hi a ṭhan belh hle rin a ni bawk.