Super Typhoon Ragasa tleh vangin Taiwan-ah mi 145 thi

Taiwan ram chu Thawhlehni khan thlipui na tak, Super Typhoon Ragasa in a nuai a, chhiatna a thlenah mi 14 an thi a, chin hriat lohin mi 124 an awm bawk. Thlipui tleh vang hian mi 7,600 chu hmun him lamah sawn chhuah an ni.

Thlipui hian ruahtui tam tak a ken tel avangin Hualien County khawchhak lamah lui a lian a, lei hnawlin khaw chhungah chirh nen a len lut a, kawngpui leh inte a chim nasa hle a, thingkung pawh eng emaw zat a tlu bawk. Fire official-te chuan hmun ṭhenkhatah tuilian hian in chhawng hnihna thlengin a chim pha tih an sawi.

Taiwan hian July - October chhung hian thli tleh a tuar fo a, kumin July thla tir lam kha an ram chhim lama typhoon Danas tleh vangin mi pahnih an thih bakah mi 100 chuang an lo hliam tawh bawk.

Thlipui leh ruah thawk vang hian nimin khan Taiwan-a Taoyuan international airport-ah flight 160 chuang cancel a ni a, rel leh ferry service-te pawh hmun ṭhenkhatah tihtawp lailawk a ni.

Super Typhoon Ragasa hian Taiwan a nuai hnuah nimin khan China chhim lam, Guangdong province a thleng a, thuneitute chuan 'red' wave warning an lo tichhuak lawk a ni. Thli tleh dawn vang hian Thawhlehni khan Guangdong-ah hian puan-in, folding bed, emergeny hmanrua leh chhanchhuah hna thawhna hmanraw hrang hrangte thawn luh a ni bawk. Mi nuai 7.7 vel chu hmun him lama insawnchhuak tura hriattir an ni.