Yemen aṭangin drone hmangin Israel chhim lam khawpui kap

Israel chhim lama Eilat khawpui chu Nilaini khan Yemen aṭanga drone kah chhuahin kah fuh a ni a, mi 22 an hliam. Yemen helpawl, Houthi chuan drone hi an kah a ni tih an sawi nghal bawk.

Iran thlawp, Houthi helpawl hian Gaza Strip-a Israel-Hamas indona thlen hnuah, Palestinian-te an thlawpna lantirin drone leh missile hmangin Israel hi an kap fo a ni. Mahse, an kah chhuah tam zawk hi Israel chuan a lo dansak a, ṭhenkhat chu ram ruakah tlain chhiatna an thlen vak ngai lo.

Drone hmanga beih an nih hnuah Israel defence minister Israel Katz chuan Houthi vauna a tichhuak nghal a, "Israel tinatu chu a let sariha nain thungrulh a ni ang," a ti. Israel sipaite chuan hliam tuarte chu damdawi-in panpui nghal an ni a, an zinga pahnih chu an dinhmun a ṭha vak lo tih an sawi.

Hetih lai hian Israel sipaite chuan Gaza Strip-ah beihpui an thlak chhunzawm zel bawk. Nilaini khan Israel sipaiten Nuseirat refugee camp an beihnaah mi 12 an thi niin Gaza-a Al-Awda Hospital chuan a sawi.