France President hlui Sarkozy kum 5 tang turin hrem

France president hlui, Nicolas Sarkozy chuan Libya ram hruaitu hlui, Col Muammar Gaddari hnen aṭanga dan kalha sum tam tham tak dawnga puhnaah thiam loh chantir a ni a, kum nga chhung jail-a tang tura hrem niin USD 117,000 chawi turin a ti bawk.

Paris criminal court chuan Ningani khan Sarkozy hremna tur hi a tichhuak a, a thubuai dang - eiru leh campaign-na sum dik lo taka hmua puhnaah erawh thiam a chantir thung.

Sarkozy hian court thutlukna hi appeal a tum thu a sawi a, appeal mah se jail-ah dah a ni phawt ang. Parisa jail-ah dah a ni dawn a, France President hlui zinga jail tang hmasa ber a ni ang.

Kum 70 mi Sarkozy hi kum 2007-2012 chhung khan France president a ni. Court thutlukna chu sawiselin, an puhna hrang hrangte pawh politics-a inbeihna a ni tih a sawi. A thubuai ngaihtuah a nih chhung pawhin tihsual a neih loh thu a sawi reng a ni.

President hlui hi kum 2007 inthlan dawna a campaign-na atan Libya hruaitu, Gaddadi sum hmanga puh a ni. Hemi chhan letna atan hian khawthlang ramte Gaddadi an hrekna tihtawp a nih theihna pui turin a intiam niin an puh. Judge Nathalie Gavarino chuan Sarkozy hian a thawhpui hnai tak takte chu Libya official-te a biaktir niin a tarlang.

Muammar Gaddafi-a fapa, Sail al-Islam-a'n Sarkozy-a'n a campaign-na atan a pa sum tam tham tak a hmang nia a puh hnuah, kum 2013 khan Sarkozy hi thubuai siamsak a ni. Kum 2014 khan Lebanon mi sumdawng, Ziad Takieddine chuan Sakozy campaign-na sum Gaddafi-a'n a tumsak tih finfiahna a neih thu leh, president a nih hnuah pawh £ mtd 43 (USD mtd 57) hu a pek thu a sawi. Dik lo taka sum inpeknaah hian Sarkozy bakah minister hlui pahnih Claude Gueant leh Brice Hortefeux te pawh thubuai siamsak niin, thiam loh chantir an ni ve bawk.

Sarkozy nupui, Italy mi supermodel leh singer Carla Bruni-Sarkozy chu nikum khan Gaddafi case-a finfiahna awmte thup bo leh, dik lo taka sum inpekna hriatpuia puhin thubuai siamsak a lo ni tawh bawk a,mahse ani pawhin an puhna hi a pha a ni.

Kum 2012 inthlana a chak zawh loh hnuah, Sarkozy hi thubuai hrang hrang siamsakin chhui a ni. Inthlan campaign-na uchuak taka sum hmang leh, a sum hman zat thupna atan PR firm ruaia puhna thubuaiah pawh thiam loh chantirin kum khat tang tura hrem a ni. Mahse, a appeal hnuah a tan hun tur hi thla rukah tihtawi sak a ni. Kum 2014-ah a chungthu ngaihtuahtu judge thamna pek tuma puhna thubuaiah 2021 khan thiam loh chantir a ni tawh bawk. Nikum December thla khan court chuan a tan hun hi jail-ah awm kher loin,a chenna inah tag vuah chunga a awm a phalsak a ni.