SKorea General Assembly-in Tattooist Act a pass

South Korea parliament, General Assembly chuan Ningani khan non-medical professional ni kher lo pawh tattoo chhut phalna licence pek theihna tur dan, Tattooist Act a pawm.

South Korea-ah hian tattoo artist hi ṭhahnem tak awm mah se kum 1992-a Supreme Court thupek angin kum 30 chuang chu an rama he hna hi medical professional chauhin an thawh phalsak an ni. Dan siamṭha tura nawrna hrang hrang a awm hnuah, National Assembly chuan dan siamthar hi a pawm ta a ni.

Kum 1992-a Supreme Court thupek tihchhuah a nih aṭangin medical professional ni lo, tattoo artist tam tak hrem an ni hman. Licence nei loa thawkte hi kum nga thleng tantir theih an nih bakah, an ram pawisa won mtd 50 thleng chawitir theih an ni bawk. Hremna tawk zat hi sawichian a ni lo a, South Korea Tattoo Union chuan kumtin hremna tawk mi 50 aia tlem lo chu an sum chawi turah an pui ziah tih an sawi.

Ministry of Health and Welfare in a tarlan danin, SKorea-ah hian tattoo artist hi 3,50,000 vel an awm a, an zinga a tlem zawk hi medical qualification nei an ni.

Tattooist Act pass hmaa sawi honaah, National Assembly-a health and welfare committee chairman Park Ju-min chuan mi tam tak, politician ngei zingah pawh an mithmul leh hmui tattoo tir an tam tawh niin a sawi. Dan hi pass a nih chuan tattoo ti duhte tan pawh a him zawk dawn a, tattoo industry hnuaia thawkte pawh dan ang thlapa pawm an ni tawh dawn a ni, a ti. Hetih lai hian Tattooist Act hi Korean Medical Association chuan an dodal thung a, tattoo chhut tir chuan vun a tihchhiat bakah, taksa hriselna pawh nghawng thei a ni tih an sawi. Hei vang hian damdawi lam thiamna nei chauh khawih phalsak a ṭul niin an tarlang.