US-in Colombia President visa titawp dawn

US State Department chuan Colombia leftist president Gustavo Petro chu New York-a Palestinian thlawptute nawrh huaihawtnaa thu a sawi ah, inhuatna leh boruak ṭha lo chawk chhuak thei zawnga thu a sawi avangin a visa chu an titawp dawn tih a sawi.

Kar liam ta Zirtawpnia New York-a nawrh huaihawtnaah president Petro hian Spanish-a thu sawiin, ram hrang hrangte chu US sipai aia lian siam tura an sipaite thawh khawm turin a sawm bakah US sipaite chu Trump thupek awih lo turin mipui a chah zui bawk. A thusawi video hi amah ngei pawhin a social media-ah a dah bawk a ni.

President Petro hi United Nations General Assembly, New York-a neih hmanga kal a ni a, assembly-a thu a sawiah pawh Trump kaihhruai sorkar chu tun hnaia Carribean-a ruihhlo tawlhtu lawng nia puh an kah chungchangah na takin a sawisel a ni. Lawng an beih vang hian ralthuam nei lo ṭhalai rethei takte an thih phah a ni tiin, US chetdan chu chhui chian a phut thu a sawi. US sorkar hian ruihhlo tawlhruk doa beihpui a thlaknaah Carribean chhim lamah hian indo lawng leh tuihnuai lawng pariat a tir a ni. Colombia hi khawvela cocaine siam chhuaktu lian ber a ni.

Petro hi US-in Colombia Preisdent visa a tihtawp sak hmasa ber a ni lo a, kum 1996 khan hetih laia president Ernesto Samper chu a campaign-na senso ruihhlo tawlhtu pawlin a tumsak nia sawi a nih avangin a visa an lo tihtawp sak tawh bawk.