Oxygen pai tel loin Mt Everest chhip aṭangin tleng thla

Poland tlanglawn mi, Andrzej Bargiel chuan oxygen pai tel loa khawvela tlang sang ber, Mt Everest chhip aṭanga vur tlengna (ski) hmanga tleng thla hmasa ber a ni.

Bragiel hian a hmain ṭum hnih, kum 2019 leh 2022 khan oxygen pai loin Mt Everest aṭanga tleng thlak hi a lo tum tawh a, a hlawhchham ve ve a ni. Mahse, kar liam ta Thawhṭanni, September 22 khan a tihlawhtling thei ta a ni. Tlang chhip aṭanga tleng thla hi chu an lo awm tawh ṭhin a, mahse, oxygen pai loa tleng thla erawh an la awm ngai lo.

Mt Everest hi meter 8,849-a sang a ni a, Bargiel hian Mt Everest-a vur intiang khawm tamna leh a hlauhawm lai, Khumbu Icefall pawh a paltlang thla a, helai hmun a tleng thlak lai hian a unaupa, Bartke chuan drone hmangin a lo kaihruai a ni. Kum 2018 khan Bargiel hian khawvela tlang sang pahnihna, Pakistan-a K2 tlang chhip aṭangin vur tlengnain a lo tleng thla tawh bawk.