Nepal PM hluiin silai hmetpuak tura thupek a chhuah loh thu sawi

Nepal prime minister hlui, KP Sharma Oli chu Gen Z kaihhruaia nawrh huaihawtnaa buaina chhuah hnu, September 9-a a ban hnuah a vawi khatna atan Inrinni khan mipui hmuhah a inlan. Oli chuan nawrh huaihawtnate laka silai hmetpuak turin thupek a chhuah lo tih a sawi.

Communist Party of Nepal (Unified Marxist-Leninist) chairman, Oli chuan Gen Z nuarte kap tura thupek a tihchhuah loh thu hi a sawi a ni.Inrinni vek khan Bhaktapur-a CPN-UML student wing, Rashtriya Yuwa Sangh ten vantlang inkhawm an buatsaihah a tel bawk a ni.

Oli hi September 9-a PM aṭanga a ban hnuah vantlang hmuhah a inlan zui lo a, Nepal Army in an veng a ni. Nawrh huaihawtna avanga a kaihhruai sorkar paihthlak a nih hnuah hruaitu lailawk atana ruat, Sushila Karkai kaihhruai sorkar chu sawiselin, Oli chuan sorkar thar chu ram danpui hmanga siam ni loin, bungrua suasam leh halna hmanga siam a ni, a ti. Sorkar thar chu ram hruaitu hluite chu thil dang a pe chhunzawm duh lo a nih pawhin venhimna chu a pe tur a ni, a ti.