Michigan biak-in beihnaah mi 4 an thi

US-a Michigan state-ah Pathianni khan silai keng pakhatin biak-ina inkhawm an neih laiin inkhawmte silaiin a pawng kah a, biak-in building a hal zui bawk. He pawikhawihna thlengah hian mi pali an thi a, hliam eng emaw zat an awm. Police-te chuan pawikhawihtu hi an kap hlum nghal a ni.

Pawikhawihna thlenna hi Detroit hmar thlang lam, Grand Blanc Township-a Church of Jesus Christ of Latter-day Saints biak-in a ni. An ram huna Pathianni chawhma dar 10.25 vel khan, biak-ina inkhawm an neih laiin pawikhawihtu nia sawi, Thomas Jacob Stanford, kum 40 mi hian truck-in biak-in hi a su a, assault-style rifle in inkhawmte chu a kap a, biak-in hi a hal a ni. Police-te chu pawikhawihna thlenna hmunah kal nghalin, biak-in beitu hi an kap ve nghal a ni. Stanford-a'n biak-in a beih leh, police-ten car park-a an kah hlum inkar hi mintute 10 vel niin news agency te chuan an tarlang.

Biak-in beitu Sanford hi US Marine hlui niin, kum 2004-2008 khan sipaiah a ṭang a, Operation Iraqi Freedom-ah khan Iraq-a tirh zingah a tel. Burton, Michigan-a cheng niin a nupui nen fa pakhat an nei nia sawi a ni. Biak-in a beih hnu hian a chenna in pawh investigator-ten an dap tawh bawk.

US president Donald Trump chuan US-ah Kristianten beih an tawk leh ta tih sawiin, pawikhawihna thleng chhui hna chu FBI in a kaihruai dawn tih a sawi. Michigan governor Gretchen Whitmer chuan pawikhawihna thleng chu a dem thu sawiin, khawi hmun pawh, a bik takin sakhaw hmun beih chu pawmzam theih a ni lo, a ti.