Singapore-ah mipui awm zat 1.2% in pung

Singapore sorkarin nimina report a tihchhuahah an rama mipui awm zat chu mtd 6.11 an tling a, nikum June thla aiin 1.2% an pung. An punna hi ram dang mi hnathawka awm an tam vang niin, mipui awm zat hi maktaduai 6 an tlin vawi khatna a ni.

National Population and Talent Division (NPTD) in report a tihchhuahah hian nikum June thla aṭanga kumin June thla chhunga non-resident population punna chu 2.7% niin, mtd 1.91 an tling. Ram dang mi hnathawka awm tam zawk hi construction, marine shipyard leh processing sector-a thawk niin, mi awmpui an tam bawk.

Singapore khua leh tui nihna nei hi mtd 4.2 awmin an zinga nuai 5 chuang hret chu permanent residents (PRs) an ni. Khua leh tui nihna nei punna hi kum khatah 0.7% a ni a, PR awm zat erawh a danglam tam lo thung.

Kum nga chhung chu Singapore-a cheng punna hi 1.5% vel a ni pha a, a hma kum ngaa an punna erawh 0.5% chauh a ni pha thung. Tun hnaia an pun chhoh nachhan hi ram dang mi, work permit nei an pun chhoh vang a ni.