Iran-in Israel tana enthlatu tihlum

Iran chuan Israel tana enthlatu pawimawh zinga mi, Bahman Choubi-asl chu an khaihlum tih nimin khan an tarlang. Kumin June thlaa Israel nena an indo hnua Israel thawhpui nia puh mi 10 a tihhlumna a ni.

Iran hian Israel intelligence service, Mossad tana thawk leh inzawmna neia puh mi eng emaw zat a lo tihlum tawh a ni. Tun thla tir lamah Israel tana thawktu nia puh, Babak Shahbazi chu tihhlum a lo ni tawh bawk.

Mossad hian Bahman hi sorkar institution data an neih theihna atan an thawhpui a, hei bakah Iran-in electronic bungrua a lak luh dante pawh an chhui bawk niin Iran judiciary news agency, Mizan chuan a sawi.

Oslo-a hmunpui nei, Iran Human Rights leh Washington DC-Abdorrahman Boroumand Centre for Human Rights chuan Iran sorkar hian kuminah mi 1,000 chuang a tihlum tawh niin an sawi a, sorkar lamin report kimchang a puanzar duh loh avangin hei ai pawh hian an tam zawk maithei nia sawi a ni bawk.