Indonesia-a school chimah mi 3 an thi

Indonesia-a East Java province-ah an ram huna Thawhṭanni chawhnu khan Islamic boarding school, Al-Khoziny Islamic Boarding School a chim a, naupang pathum an thi. Nimin thleng khan in chimin a delh naupang eng emaw zat chu an chin hriat a la ni lo.

National Search and Rescue Agency hotu, Mohammad Syafii chuan zirlai naupangte hi chawhnu lam ṭawngṭaina hun hmang tura an kal khawm laiin an awmna in chung hi a chim niin a sawi.

Nimin zing khan naupang 65 chu chin hriat lohin an la awm tih school noticeboard-ah tarlan a ni a, a tam zawk chu mipa niin kum 12-17 inkar an ni. Hmeichhiate chu chhawng hranah an ṭawngṭai avangin a tam zawk chu an tlanchhuak hman nia sawi a ni. Building chim thenfai hna hi khawl hmanga thawh ni mah se, a chim belh hlauhthawn avangin khawl lian an hmang ngam lo a, hei vang hian chhanchhuah hna thawh pawh duh angin a chak thei lo niin an sawi.

In chimna lai, ṭawngṭaina atana hman chhawng hnih hi thuneitute phalna la loa an sak belh a ni tih provincial police hotu Jules Abraham Abast chuan a sawi. Sorkar chuan in chim chhan hi a chhui chiang nghal bawk.