Morocco-a ṭhalaite nawrh huaihawtnaah buaina chhuak

Morocco-a ṭhalaiten sorkar laka lungawi lohna lantira nawrh an huaihawtna hmun eng emaw zatah buaina a chhuak a, thil tam tak tihchhiat a ni bawk. Ṭhalai rual hian sorkarin 2030 World Cup inbuatsaihna atana sum tam tak a dah chu an duh lo a, healthcare leh education lam ngai pawimawh zawk turin an phut a ni.

Kar liam ta Inrinni aṭang khan nawrh hi huaihawt ṭan a ni a, an zinga mi eng emaw zat man an ni. Thawhlehni khan nawrh huaihawtte leh security force-te an intibuai a, khawpui hrang hrangah tharum thawhna a thleng zui a ni.

Interior Ministry chuan nawrh hi tute nge tih hriat loh, 'Genz 212' group nia inchhalten an huaihawt a nih thu sawiin, online hmangin ṭhalaite chu an fuih niin a tarlang. Pungkhawmte hian chem leh hmanraw dangte an keng niin an sawi bawk a, hei vang hian security force-te chuan invenna atan silai an ken a ngai tih thuneitute chuan an tarlang.

Nawrh huaihawtnaa buaina chhuakah law enforcement mi leh sa 263 in hliam an tuar a, an motor 142 tihchhiat a ni bawk. Hei bakah private motor 20 pawh tihchhiat tel a ni bawk a, civil mi hliam tuar 23 an awm bawk a ni.