Manchester-a synagogue beihnaah mi 2 an thi

England-a Manchester khawpuiah Heaton Park Congregation Synagogue chu an ram huna Ningani khan mi pakhatin beiin mi pahnih an thi a, hliam pathum an awm. Pawikhawihtu hi Manchester police-te chuan an kap hlum nghal a, mi dang pathum an man bawk.

Nilaini kha Juda te tana ni pawimawh, Yom Kippur a ni a; synagogue-ah hian mi eng emaw zat an kalkhawm a, pawn lama an awmkhawm lai chuan pawikhawihtu nia sawi, kum 35 mi Jihad al-Shamie hian a car-in a su a, hmanrua nen a bei zui a ni.

Ram hruaitu leh Juda hruaitute chuan pawikhawihna thleng an dem thu an sawi a,

UK-a Chief Rabbi chuan synagogue beihna chu Juda mite sawiselna leh huatna hluar chhoh vanga thleng a ni, a ti. UK prime minister Keir Starmer chuan a thuneihnain a huam chinah a theih ang anga Juda-te himna ngaihtuahsak a tiam. He thil thleng vang hian London-a Sygnagogue bakah Juda hmun pawimawh dangahte venghimtu dah belh nghal an ni bawk. PM hi Copenhagen, Denmark-ah summit hmangin a kal a, an rama pawikhawihna thleng vang hian emergency committee meeting kaihruai turin a haw hma phah a ni.

Synagogue beitu, Jihad al-Shamie hi naupang a nih laia UK-a pem lut niin, kum 2006-ah British khua leh tui nihna hi pek a ni. A chanchin chhuinaah firfiak zawnga chetnaah inhnamhnawihna a la nei lo nia hriat a ni. Pawikhawihna thleng kaihhnawiha man, mi pathum zingah hian hmeichhe pakhat, kum 60 chuang mi pawh a tel.

Israel prime minister Benjamin Netanyahu chuan British synagogue beihna thleng chu na taka a dem thu sawiin, firfiakte laka nem chuan firfiaka chetna tam zawk a thlen a ni tiin, chakna leh thawh hona ṭha hmang chauha hneh theih an ni tih a sawi. Israel foreign minister Gideon Sa'ar chuan UK chu an rama Juda huatna hluar chho zel chungchanga hma an laknaa hlawhchhamah a puh. A hma aṭangin thuneitute chuan Juda huatna leh dodalna boruak awm ṭhin titawp turin hma an la ṭha tawk lo niin a sawi.