Chevron refinery-ah kangmei nasa tak chhuak

US-a Los Angles khawpui bula Chevron company refinery-ah an ram huna Ningani zan khan kangmei nasa tak a chhuak.

California governor Gavin Newscom office chuan El Segundo-a company oil thlitfimna hmun a kan thu hi tarlangin, kangmei ṭhelh bakah a chhehvel hmun leh mipui himna tura theihtawp an chhuah thu a sawi. Kangmei chhuah hun hi zan dar 9:30 vel niin, dar 11-ah chuan an thunun thei tawh niin Los Angeles County Supervisor Holly Mitchell chuan a tarlang.

El Segundo hi Los Angeles chhim lam, km 24 vela hlaah a awm. Chevron refinery hi square km 3.9 vela zau niin, pipeline km 1,770 chuanga thui a nei bawk. Ni khatah he hmun aṭang hian crude oil barrel 290,000 thleng an thlifim thei a ni. An hmunah hian tank lian 150 neiin, oil barrel mtd 12.5 an chhekkhawl thei a ni. Kum 2022 khan refinery-ah hian kangmei a lo chhuak tawh bawk a, darkar hnih hnuah an ṭhelh mit thei a ni.

Chevron refinery hi kum 1911-a din niin, US West Coast-a refinery lian ber zinga mi a ni. Refinery-a kangmei chhuak vang hian nimin khan oil man 1% in a pun phah bawk. An refinery-a kangmei chhuah chhan hi sawi an la nei lo a, chhui chian mek a ni. Thawktu zingah hliam an awm lo tih an sawi.